NETWORKING

Quen non coñeceu por un amigo/a, compañeiro/a...oportunidades de emprego? Pois, se é así, inconscientemente estamos empregando a técnica do networking para a nosa busca de emprego.

En qué consiste?

Esta técnica de busca de emprego é a que máis funciona para atopar oportunidades de traballo; consiste en informar á nosa rede de contactos da nosa situación de busca de emprego e se saben dalgunha oferta ou oportunidade de traballo que nolo comuniquen. Ademais, estes poida que informen ós seus coñecidos ampliando, desta maneira, a rede de contactos para poder coñecer máis oportunidades de emprego.

Mais é importante non descoidar ós nosos contactos, xa que esta técnica pódese considerar como recíproca; é dicir, hoxe axúdasme ti a min pero mañá poida que te teña que axudar eu a ti.

Ollo! Con esta técnica non conseguimos un traballo non merecido (“enchufe”), senón que é unha vía máis de información sobre posibilidades de emprego.

Cal é a súa utilidade?

Esta técnica é interesante porque ademais de servir para atopar oportunidades de emprego, tamén é útil para darnos a coñecer e para compartir información e coñecementos cos demais.

Así mesmo, a rede de contactos tamén é importante unha vez que consigamos unha entrevista, posto que poden dar recomendacións á persoa que nos entrevista e nos pode dar información sobre o posto de traballo e entidade ou empresa.

Quen utiliza esta técnica?

Normalmente as persoas que empregan esta técnica son xente que está buscando traballo, pero, tamén é común que as empresas a utilicen para atopar persoas, posto que é o método máis rápido e eficaz; preguntan ós seus empregados/as se coñecen a alguén que lle poida interesar o posto de emprego ofertado. Fíanse máis da xente que os demais recomendan que dunha persoa da que non teñen ningunha referencia. Moitas das ofertas de traballo non saen publicadas porque son directamente ocupadas por persoas coñecidas das traballadoras/es; estas ofertas forman o chamado “mercado oculto” posto que nunca saen á luz.

Pero...como podemos aumentar a nosa rede de contactos?

• Acudindo a cursos, congresos, feiras de emprego,... Nestes actos relacionarémonos con persoas do noso ámbito que nos poden botar unha man no noso proceso de busca de emprego. Ademais, tamén nos podemos dar a coñecer nas feiras de emprego e nos novos eventos chamados pinkslipparty; a diferenza dos cursos e congresos, estas son xenéricas, pero poida que haxa stands de entidades e/ou empresas do noso ámbito.
• Empregando redes sociais e profesionais.Utilizando estas novas ferramentas web tamén nos podemos dar a coñecer e relacionarnos con persoas do noso eido; ademais, co seu emprego saímos das nosas fronteiras podendo contactar con persoas doutros países e informarnos de oportunidades de emprego do exterior.
• Participando en foros, blogs,...Este punto está moi relacionado co anterior; a través da participación nestes recursos coñeceremos a persoas que tamén nos poidan axudar durante a nosa busca de emprego informándonos de oportunidades de traballo.
• Participando en colexios profesionais. Un factor moi importante é a participación nos colexios profesionais. A través del poderemos coñecer a variedade de xente do noso ámbito que nos poderá aconsellar e facilitar o noso proceso de busca de traballo.
• Durante as nosas actividades de lecer. E non podemos esquecer que en calquera lugar e momento creamos relacións; nunha voda, nunha festa, na piscina,...coñecemos persoas e é unha oportunidade máis para informar de que estamos na procura de emprego e, se coñecen algunha oferta, que nos informen. Somos seres sociais e en todos os lugares atopamos persoas que nos poden facilitar a busca de emprego.

Espero que esta información vos axude un pouquiño máis! 

Un saúdo blogueir@s!

María P. Sande

OS CERTIFICADOS DE PROFESIONALIDADE

Nesta nova publicación, imos a tratar o tema dos Certificados de Profesionalidade. Con quérese explicar, dunha maneira sinxela, o que son, para que serven e como se poden conseguir.

• Que son?

Os Certificados de Profesionalidade parten do Catálogo Nacional de Cualificacións Profesionais do Instituto Nacional de Cualificacións. Son documentos que nos acreditan oficialmente que estamos cualificados para desempeñar un determinado posto de traballo. E...cando estamos cualificados? Cando adquirimos as competencias para desenvolver unha actividade laboral.

Os certificados están compostos por unidades de competencia e estas son adquiridas a través de módulos formativos. Ademais, os Certificados de Profesionalidade clasifícanse en varios niveis e, cada un ten uns determinados requisitos para o seu acceso; así mesmo tamén se clasifican en diferentes familias profesionais.

• Para que serven?

Os Certificados de Profesionalidade proporcionan unha acreditación de cualificación profesional; aseguran que unha persoa é competente nunha actividade laboral.

Así pois facilitan a inserción laboral e a selección de persoal, posto que se unha empresa ten definidas as competencias que son necesarias para un posto será máis fácil o proceso de selección.

Ademais, ó ser módulos formativos acumulables podemos realizalos en distintos momentos; isto quere dicir, que se nun momento estamos a cursar un Certificado de Profesionalidade e, por calquera circunstancia temos que abandonalo, darannos unha acreditación dos módulos xa cursados podendo desenvolver os outros noutro momento e así obter o certificado. Este feito facilita a inserción laboral xa que, como veremos no último apartado, unha persoa pode adquirir un certificado de profesionalidade tan só adquirindo as unidades de competencia que lle falta.

Así mesmo se queremos cursar un ciclo de Formación Profesional e xa temos cursados módulos dalgún certificado de profesionalidade relacionado, estes poderán ser convalidados posto que xa temos adquiridas as unidades de competencia asociadas ós módulos; e viceversa, se temos cursado un ciclo formativo e queremos obter un certificado de profesionalidade que teña relación co ciclo, se os módulos coinciden tamén poderán ser convalidados.

• Como os podemos conseguir?

Os Certificados de Profesionalidade podémolos conseguir a través de dúas vías:

• A través da vía formativa

Como xa comentamos en liñas anteriores, para conseguir un Certificado de Profesionalidade por esta vía debemos cursar os módulos formativos que compoñen o certificado. Así pois, unha vez adquiridas as unidades de competencia conseguiriamos o Certificado de Profesionalide.

Estes certificados son organizados polo Servizo Público de Emprego e outros centros autorizados.

• A través da experiencia laboral

Ademais da vía formativa, tamén podemos demostrar que temos adquiridas as competencias dun determinado Certificado de Profesionalidade a través da nosa experiencia laboral. Para a súa obtención, temos que pasar o proceso de avaliación e acreditación de competencias que convoque a Administración; desta maneira, se acreditamos ter adquiridas determinadas competencias dun certificado teremos que cursar aquelas unidades de competencia que non demostramos.

Este procedemento está composto por diferentes fases: asesoramento, avaliación e acreditación. Durante o proceso ofrécennos o plan de formación que máis se axuste ó noso perfil profesional.

Neste enlace podedes consultar máis informción sobre os Certificados de Profesionalidade: http://traballo.xunta.es/portada-certificados-de-profesionalidade

Un saúdo!!!

María P. Sande

A ENTREVISTA DE TRABALLO

“Soa o teléfono; é para citarte para unha entrevista de traballo.... que nervios!!! E agora... que?” Seguro que a todas e todos nós nos pasou esta situación algunha que outra ocasión. Pois despois do “agora que?” é o momento de preparar a entrevista de traballo para que saia perfecta!

Neste artigo imos sinalar algúns aspectos que debemos ter en conta á hora de enfrontarnos a ela:

• Preparar con anterioridade a entrevista. Cando nos chaman para citarnos para unha entrevista debemos preparar o que imos dicir; dependendo do posto de traballo, comentarémoslle as nosas fortalezas e o que lle podemos ofrecer relacionado co posto. Ademais, debemos supoñer algunhas preguntas que poida que nos fagan e ter pensadas as contestacións; en definitiva, non podemos chegar e improvisar, senón que temos que ter algunha información preparada.
• Informarnos sobre a entidade e/ou empresa. Este punto está moi relacionado co anterior. Antes de acudir á entrevista é fundamental informarnos dos servizos que a entidade e/ou empresa ofrece á sociedade e pensar en que posto poderiamos traballar e que poderiamos ofrecerlles. Desta maneira, a persoa entrevistadora detectará que temos interese na súa entidade e que coñecemos o seu quefacer.
• Coidar a imaxe persoal. É imprescindible acudir a unha entrevista de traballo cun bo aspecto persoal; ir aseada/o, vestida/o acorde á ocasión, sen demasiada maquillaxe,...son factores que temos que coidar cando vaiamos a unha entrevista.
• Apagar o teléfono. É importante que antes de entrar na entrevista desconectemos o teléfono móvil, posto que dá mala impresión se, durante a entrevista, soa o teléfono. Se, por unha casualidade, non nos lembramos de apagalo e soa, debemos desconectalo o antes posible e pedir desculpas á persoa entrevistadora.
• Puntualidade. É recomendable chegar ó lugar da entrevista cinco minutos antes para así non ter imprevistos, non chegar tarde e que a persoa entrevistadora non teña que esperar por nós; a impuntualidade é un factor moi negativo que afecta á nosa imaxe.
• Sempre temos que levar un curriculum vitae impreso. Aínda que xa llo mandáramos pola rede ou llo entregáramos en man, é aconsellable levar unha copia; poida que estes non o teñan impreso e queiran botarlle unha ollada ou preguntarnos acerca da información que contén. Ademais, se pasou certo tempo do envío do curriculum, deixariámoslle un C.V. actualizado.
• Ser optimista e confiar en nós mesmos. Nunca debemos ir cunha actitude pesimista a unha entrevista de traballo, xa que ese pesimismo será detectado polo entrevistador/a e afectará a nosa imaxe. Debemos ir cunha actitude positiva e pensar que o “non” xa o temos e que podemos conseguir o “si”. Ademais, temos que confiar en nós mesmos para que os demais o fagan. Neste senso, é aconsellable ir con tranquilidade e que a entrevista se desenvolva coa maior naturalidade posible.
• Non ser pedante. Durante a entrevista non podemos ser pedantes utilizando, abusivamente, palabras técnicas. É recomendable empregar algunha palabra técnica, se o entrevistador é do noso ámbito, pero desenvolvéndonos con naturalidade. Ademais, debemos dar a coñecer o que sabemos pero dende a humildade, posto que a teoría e palabrería é moi fácil pero o importante é a práctica no posto de traballo. Así pois, debemos ir con cautela e amosar os coñecementos que temos dunha maneira moi xeral.
• Coidar os xestos corporais. Temos que ter en conta que a maneira de sentarnos e de expresarnos xestualmente dan información adicional. Por isto, ante unha entrevista de traballo temos que ter coidado cos xestos corporais e que non dean información contraditoria á que estamos a dicir. Por exemplo, se estamos a comentar que temos moitas ganas de comezar a traballar e aprender das nosas compañeiras/os, non podemos estar sentados/as como se estivéramos no sofá das nosas casas, senón que debemos de sentarnos coa espalda recta e cun xesto de interese, motivación, ganas,...
• Amosar entusiasmo polo traballo. Durante a entrevista debemos amosar interese polo posto de traballo e explicar o que podemos ofrecer e desenvolver nese posto. Pero...ollo! Non é recomendable ofrecer unha imaxe de desesperación nin pena!
• Preguntar. Debemos realizarlle preguntas sobre o posto de traballo e entidade á persoa entrevistadora para que detecte que temos interese no posto e estamos motivadas/os para traballar con eles/elas.
• Non falar mal doutras empresas, xefas/es ou compañeiras/os. Se tivemos unha mala experiencia con outras entidades ou empresas, é aconsellable que se manteñan á marxe e non se comenten na entrevista de traballo. Se a persoa entrevistadora escoita de nós palabras ofensivas cara outra empresa, esta pensará que tamén o imos facer coa súa entidade e influirá á hora da seleccción da candidata/o.
• Sempre quedar ben ante a persoa entrevistadora. No tocante a isto, aínda que notemos que, por calquera circunstancia, non nos van coller para o posto de traballo sempre temos que quedar ben e agradecerlles a oportunidade que nos deron de poder presentarnos e deixar explicarlle a información do curriculum. Desta maneira “non cerramos portas senón que as deixamos entreabertas” para posteriores oportunidades.
• Pensar que sempre é unha experiencia da que podemos aprender. Aínda que non nos collan para o posto de traballo, temos que pensar que unha entrevista de emprego é sempre unha oportunidade de aprendizaxe e, ó finalizala, temos que autoavaliarnos e sinalar os puntos fortes e débiles que se produciron durante o desenvolvemento desta; desta maneira, intentaremos que na seguinte non se produzan os erros que se cometeron.
• Reformulación positiva: convertir o malo en bo. Debemos buscar o lado positivo ós nosos puntos débiles; é dicir, que se na entrevista nos comentan que non temos experiencia laboral, sinalar que estamos moi motivados por entrar no eido laboral e con moitas ganas de traballar; se un punto débil é a idade avanzada, poñer o acento na nosa madurez, responsabilidade, experiencia,... Temos que contestar positivamente ante calquera aspecto que poida que sexa unha traba para conseguir o posto.
• Preguntas moi persoais, como actuar? Non hai unhas pautas universais para responder ás preguntas relacionadas co noso ámbito privado; cada quen sabe os seus límites e ata onde quere contar. Calquera que sexa a resposta non podemos contestar de maneira que nos sintamos ofendidas/os, senón que debemos responder de maneira educada e cordial. Temos que ter coidado con estas preguntas porque, moitas das veces, á persoa non lle interesa a información, senón o noso comportamento ante estas cuestións privadas.

Espero que estes conselliños vos axuden a afrontar mellor as entrevistas de emprego!

Recordarvos que estes artigos tamén están publicados no boletín mensual do Colexio de Educadoras e Educadores Sociais de Galicia onde podedes atopar máis publicacións interesante!

María P. Sande

CONSELLOS PARA REALIZAR UNHA CARTA DE PRESENTACIÓN

Como todas e todos sabemos, ademais do curriculum vitae tamén podemos entregar a nosa carta de presentación; esta, como o seu nome indica, preséntanos ante a persoa encargada de selección de persoal xunto co CV. Hai diferentes tipos de cartas pero as máis empregadas son a carta para responder a unha oferta de traballo e/ou para presentar a nosa autocandidatura.

A continuación, imos salientar algunhas recomendacións para a súa elaboración:

• Adaptación á empresa a quen vai dirixida e/ou oferta de emprego

A carta de presentación, como o curriculum vitae, temos que realizala adaptándoa á entidade e/ou empresa. Ademais tamén debemos ter en conta se é unha carta para autocandidatura ou se é para responder a unha oferta de emprego. É aconsellable ter unha carta modelo e, despois, modificala en base á entidade, oferta,... Dependendo do posto de traballo engadiremos unha ou outra información. Tamén é aconsellable que vaia datada para saber cando foi entregada e, se lle volvemos a enviar outra, saber que a temos que actualizar.

• Non dar pena nin unha imaxe de desesperación

Cando elaboremos a carta de presentación non podemos redactala de maneira que demos pena e desesperación por atopar un posto de emprego; non temos que demostrar a necesidade de emprego, senón a nosa preparación, formación, capacidades,... Temos que vendernos!

• Que estea acorde co CV que acompaña

Como a carta de presentación se achega xunto co noso curriculum vitae, ambos documentos deben ter o mesmo formato (tipo letra, papel,...). Ademais o contido da mesma debe adaptarse ó que engadimos no curriculum para que a información dos dous documentos concorde.

• Dar impresión de motivación, optimismo, ganas de traballar

A carta represéntanos tal como o fai tamén o curriculum; así, a través dela debemos transmitir que temos moitas ganas de traballar e motivadas para afrontar o posto de traballo. Tampouco temos que transmitir unha gran efusividade, senón que debemos demostrarlle que temos moito interese en participiar no seu grupo de profesionais.

• Non se trata de repetir o curriculum, senón de resaltar o máis importante

Na carta non debemos repetir a información que contén o CV, senón que temos que salientar os aspectos máis salientables para cada posto de traballo; é dicir, nela debemos reflectir a información que máis relación teña co posto ou oferta de traballo. Tamén temos que lembrar que a carta só debe ocupar unha páxina, non sendo beneficioso que ocupe dúas ou máis; temos que darnos conta que a persoa encargada da selección emprega o mínimo tempo para ler curriculums e cartas de presentación, polo que estes deben ser moi concisos e breves.

• Non se grapa xunto co curriculum vitae

Aínda que a carta de presentación se achega co curriculum, non debemos grapar os dous documentos; é recomendable entregalos de maneira conxunta nun sobre.

• Manter a orde nos contidos da carta

Non mesturar os contidos que imos a engadir na carta. Debemos comezar pola xustificación do envío da carta e CV, despois pola formación e capacidades que sexan relevantes para o posto e, por último, despedirse cordialmente.

• Non adxuntala cando se envía por correo-e

Se enviamos a carta de presentación por correo electrónico, o máis recomendable é que non se adxunte como se fai co curriculum, senón que a carta sexa o propio corpo da mensaxe. Así, cando o abran xa leerán a xustificación do envío do CV, sen necesidade de ter que abrir algún dos documentos axuntos.

ERROS FRECUENTES NO CURRICULUM VITAE

Todos e todas sabemos que a primeira impresión que lle chega á empresa sobre nós é a través do noso curriculum vitae; así pois, a presentación deste documento ten que ser inmellorable non cometendo erros á hora da súa elaboración e entrega.

Neste artigo vamos a comentar algúns dos erros máis frecuentes á hora da elaboración do CV.

• Non adaptar o CV á oferta de emprego.

Non é recomendable enviar o mesmo CV a diferentes empresas e/ou entidades, senón que temos que adaptar o noso curriculum en función do ámbito profesional. Por exemplo, se queremos enviar o CV a unha entidade relacionada co ámbito da discapacidade e temos diversas experiencias laborais de diferentes ámbitos, poñeremos antes as que se relacionen con este eido profesional; é dicir, destacaremos a formación e/ou experiencia que máis se axuste a esa actividade.

• Erros ortográficos.

Cando enviamos un CV é aconsellable revisar a ortografía; a nosa imaxe queda moi prexudicada se no curriculum hai algún erro ortográfico. Así mesmo, é recomendable que unha persoa da túa contorna lea o documento para ter unha segunda opinión do mesmo e detectar fallos ortográficos dos cales non nos decatamos.

• Enumerar todos os cursos complementarios.

Este punto está moi relacionado coa adaptación do CV á oferta de traballo. Aínda que teñamos múltiples cursos que complementan a nosa formación regrada, é recomendable sinalar de maneira específica os cursos que se relacionen co ámbito da oferta de emprego; así mesmo, os demais cursos podémolos engadir de maneira máis abreviada e xenérica.

• Incluír todos os datos persoais.

Estamos acostumadas/os a incluír todos os datos persoais no CV, pero estes poden ser factores de discriminación que lle facilita á persoa responsable a elección do candidato/a; neste senso, é aconsellable poñer só os datos necesarios (nome e apelidos, número e correo-e de contacto e localidade). Pero tamén, como en todos os apartados do currículum, témolos que adaptar ás nosas circunstancias e ós requisitos da oferta de emprego porque, por exemplo, se unha persoa rematou de estudar e non ten experiencia laboral e é xoven, debe poñer a súa data de nacemento porque xustifica o non ter experiencia laboral.

En canto á foto, non é requisito imprescindible e non debería ser relevante para a decisión da contratación ou non, pero o certo é que as persoas responsables de contratación poden consideralo importante para ver as “vibracións” que lle transmite. En caso de engadila, non vale calquera, escolle a túa mellor foto.

• Conta de correo electrónico inapropiada.

Cando poñemos a nosa conta de correo electrónico no curriculum vitae debemos ter coidado co nome identificativo desta, pois unha conta cun nome con pouca seriedade sería prexudicial para a nosa presentación; se non temos unha conta cun nome serio é aconsellable crear unha nova e identificarse de maneira que non prexudique a nosa imaxe profesional.

• Entregar o CV en formatos modificables, con virus ou demasiado pesados.

Á hora de enviar o noso curriculum vitae a través da internet, é recomendable transformar o documento a .pdf, posto que se vai en formato .doc, .odt e similares, pode descolocar a súa estrutura e verse desorganizado. Así mesmo, hai que coidar que o arquivo non estea contaminado de ningún virus informático e que non sexa pesado, xa que isto pode influír á hora de abrilo e incluso de que se reciba correctamente.

• Mentir ou esaxerar.

Ó elaborar o noso curriculum vitae é importante que todo o contido sexa verdadeiro. Non debemos mentir nin esaxerar ningunha información do currículum, xa que como di o refrán “píllase antes a un mentireiro que a un coxo”. Se temos sorte e nos chaman para unha entrevista de traballo, a persoa encargada de realizala verificará se os datos do CV son reais ou non; se nalgún deles observa que se mentiu ou se esaxerou a nosa imaxe quedará afectada negativamente, e non só para ese proceso de selección senón que poida que para outros futuros (“cría fama e bótate a durmir”).

• Usar formatos estándar e plantillas.

Poden usarse formatos estándar ou plantillas, sobre todo se non dominamos ben os programas de edición de textos. Pero o CV tamén pode ser un medio a través do cal podemos amosar certa creatividade e distinción respecto dos demais, sen caer en decoracións esaxeradas ou innecesarias, demasiados tipos de letra, múltiples cores... (ollo! máis vale pecar por defecto que por exceso).

• CV demasiado longo.

Temos que ter coidado de que o noso curriculum vitae non ocupe máis de dúas follas; ten que ser o máis conciso e breve posible para non cansar á persoa que o teña que examinar. Ademais, elaborándoo de maneira breve as/os responsables encargados/as de revisalos detectarán a nosa capacidade de síntese. Neste senso non debemos redactar un curriculum, senón que é mellor enumerar os aspectos máis importantes da nosa vida profesional.

• Non incluír voluntariado, colaboracións, publicacións,...

No curriculum vitae debemos incluír todas as actividades levadas a cabo relacionadas co noso quefacer profesional aínda que non teñan carácter laboral, sobre todo cando non temos experiencia ou non está relacionada co posto ao que queremos optar. Por exemplo, se somos voluntarias/os e/ou colaboramos con algunha asociación ou entidade é recomendable engadilo no CV para que os responsables do proceso de selección vexan que estamos interesados/as no noso eido profesional e estamos en permanente contacto.

• Usar sempre un CV cronolóxico.

O formato máis frecuente para elaborar un CV é o cronolóxico ou cronolóxico inverso; pero isto deberiámolo adaptar en función da empresa ou entidade e do contido. Temos que ter en conta que tamén existe o tipo de curriculum funcional onde se lle dá máis importancia ó contido que ás datas, e que, en moitas ocasións, poida que sexa o máis axeitado. Por exemplo, se temos algo de experiencia como educadora social, pero de xeito intermitente tivemos empregos noutros sectores, pode interesarnos agrupar a experiencia como educadora, dándolle relevancia, e o demais agrupalo como “outra experiencia”.

Espero que estes consellos vos sirvan de axuda!!!!

Saúdos!

María P. Sande

O COLEXIO DE EDUCADORAS E EDUCADORES SOCIAIS DE GALICIA (CEESG)

Esta nova entrada vai dedicada ó Colexio de Educadoras e Educadores Sociais de Galicia (CEESG), entidade que me representa profesionalmente como educadora social en moitos dos actos e acontemecementos do noso país.

Realizando prácticas dun curso no colexio dinme conta de que é moi importante ter un referente a onde acudir se temos algunha dúbida ou pregunta sobre a nosa profesión. Ademais, grazas a estar no colexio veume a idea de ser blogueira!

O CEESG é un colexio profesional que traballa para que a nosa profesión sexa recoñecible e visible na sociedade, xa que ó falar de educadora social moitas persoas pregunta…. Es traballadora social? Educadora social…, que é iso?

Para responder a esta pregunta déixovos un vídeo realizado por compañeiras e compañeiros educadoras/es.

 

 

Como aínda é algo confusa a educación social na sociedade, considero o colexio como un piar fundamental para que a nosa profesión evolucione e consiga o prestixio social que merece. Todas as persoas que participan no CEESG traballan co fin de loitar polos nosos intereses e dereitos como profesionais do eido socioeducativo.

Se es educadora ou educador social é importante a colexiación porque te informas de moitas novas referentes á educación social, ademais de proporcionarnos axuda e asesoramento sobre calquera dificultade que nos atopemos desenvolvendo o noso quefacer profesional. A páxina web do ceesg é a seguinte: www.ceesg.org

Por certo! Moitos dos artigos que se van publicar no blog, tamén se publicarán no boletín mensual que o colexio elabora; podédelo consultar neste enlace http://ceesg.org/publicacions/boletin

Sen máis, un agarimoso saúdo!

María P. Sande

ETAPAS DO PROCESO DE BUSCA DE EMPREGO

Bos días!!!

Hoxe publico unha entrada na cal se recollen as fases do proceso de busca de emprego. Sabemos que este proceso require tempo, dedicación e esforzo. Entón... podemos dicir que unha persoa que busca traballo está parada, sen facer ningunha actividade? Non! Unha persoa que busca activamente emprego está facendo un traballo que é duro e constante co fin de conseguir un posto remunerado.

Pero...como organizamos o noso proceso de busca de emprego? Para empezar debemos planificar e estruturar as actividades que imos realizar. Para isto podemos elaborar un cronograma no cal vaiamos especificando as tarefas que temos que desenvolver día a día; desta maneira crearíamos unha rutina constante.

Podemos estruturar o proceso en diferentes fases; un exemplo delas son as que se establecen no cadro seguinte.

Fases	Descrición
1.º Definición do obxectivo profesional.	Para a súa definición debemos autocoñecernos e analizar os nosos puntos fortes e débiles, aínda que temos que pensar que todo se pode conseguir e mellorar. A través desta información e do posto de traballo que desexamos conseguir definimos o noso obxectivo profesional.
2.º Elaboración do curriculum vitae e memoria profesional.	Creamos un documento onde agrupar toda a nosa información profesional e capacidades persoais (formación, experiencia, competencias persoais,...). Este documento vai ser o referente para, logo, adaptalo a cada oferta ou entidade de traballo; tanto pode ser un curriculum vitae como a memoria profesional.
3.º Informarnos dos servizos que nos poden axudar no proceso e inscribirnos no Servizo Público de Emprego.	É recomendable que esteamos informadas/os dos recursos que existen na nosa contorna e que nos poidan axudar no proceso; un deles é o Servizo Público de Emprego no cal nos temos que inscribir como demandantes de emprego para que nos avisen se xorde algunha oferta.
4.º Busca de ofertas de emprego.	A busca pódese realizar a través de portais de emprego, xornais, boletíns,... Seleccionamos as que consideremos importantes e interesantes, informándonos das características das entidades.
5.º Adaptación do CV, realización de cartas de presentación e envío dos mesmos.	Unha vez seleccionadas ás ofertas, debemos adaptar o CV a estas; ademais, é recomendable a elaboración de cartas de presentación para achegalas xunto co curriculum. Procederase ó seu envío a través da canle que se especifica na oferta de emprego. Pero, se por casualidade é dunha empresa que nos queda cerca, é interesante que nos acheguemos ata ela para entregarlle o CV persoalmente.
6.º Autocandidatura.	Nos tempos que corren é difícil atopar ofertas de emprego; por iso outra opción é optar pola autocandidatura para que as empresas nos coñezan. Esta conleva diferentes pasos a desenvolver: Busca de entidades que son do noso interese e informarnos do seu servizo. Adaptar o CV ás diferentes entidades para o seu envío. Elaborar cartas de presentación para explicar a nosa autocandidatura e o que podemos ofrecer. Envío dos documentos.
Lembra! Debemos ter rexistradas todas as entidades á cal enviamos o CV, sinalando se foi por autocandidatura ou oferta, a data, os servizos que ofrecen, se contestaron e se nos citaron para unha entrevista.

Durante as fases podemos realizar o noso CV online, participar en foros, blogs,...e entrar en redes sociais profesionais xa que tamén son unha vía para informarnos sobre oportunidades de emprego. Ademais, como analizamos as nosas fortalezas e debilidades é aconsellable mellorar os punto débiles acudindo a cursos, obradoiros,... Ollo! Témonos que acordar de actualizar o CV cada vez que asistamos a algún destes.

A procura de emprego nun momento coma este no que o traballo escasea, pode producirnos gran desgaste e afectarnos emocionalmente, o que pode chegar a afectar a nosa saúde e as nosas relacións cos demais. Algo tan sinxelo como establecer un horario e levar unha axenda ou rexistro dos contactos realizados, faranos manter certa sensación do control do proceso de búsqueda, o que pode axudarnos a non obsesionarnos. Recorda que é moi importante disfrutar do noso tempo de lecer e manter o optimismo.

*Tanto esta publicación como as seguintes, que estean relacionadas coa orientación laboral, tamén son publicadas no boletín mensual que o Colexio de Educadoras e Educadores Sociais de Galicia elabora. O enlace para botarlle unha ollada ós boletíns é o seguinte: http://ceesg.org/publicacions/boletin

 

Un saúdo!

María P. Sande

TÉCNICA DE ESTUDO: MÉTODO PULSERA

Esta nova entrada está relacionada coas técnicas de estudo, xa que estes días chegáronme ó correo-e dúbidas sobre este tema e unha gran amiga e compañeira de profesión tamén anda a voltas con esta temática.

Revisando os  apuntes de psicopedagoxía e buscando pola rede atopei unha técnica bastante interesante para mellorar o estudo:  O Método PULSERA.

Este método componse de:

1.      Prelectura Urxente

Nun primeiro momento debemos ler o texto para coñecer a súa temática, ademais de visualizar os apoios que o acompaña (debuxos, esquemas,…).

2.      Lectura detida

O obxectivo desta segunda lectura é máis concreto; con ela temos que obter información clara e precisa do tema. Esta lectura ten que se atenta e comprensiva, pois hai que entender o contido do texto para realizar un resumo coas propias palabras.

Para mellorar a comprensión lectora a facilitar o desenvolvemento deste punto, podemos empregar a técnica Ogle (Táboas KWL). Despois da prelectura urxente, debemos cubrir a seguinte táboa:

Knowledge (que sei de…). Debemos escribir o que sei do tema, non abonda con pensalo!

Want (que quero saber de…). Debemos escribir o que queremos saber do tema.

L E C T U R A

Learned (que aprendín de…). Despois da lectura, debemos escribir a información nova que aprendemos.

Así mesmo, a través desta táboa activamos os coñecementos previos que teñamos do tema que queremos estudar.

3.      Subliñado

É preciso subliñar as palabras e/ou ideas clave do texto. En todos os textos hai contido que non é demasiado relevante; por iso debemos discriminar as ideas principais das secundarias e subliñar as máis relevantes para a comprensión profunda do texto.

4.      Esquema

O esquema é unha técnica moi persoal; o que se pretende con ela é realizar unha síntese do texto lido. Despois de diferenciar as ideas principais das secundarias, debemos organizalas e estruturalas de maneira esquemática para comprender o tema.

5.      Resumo

Despois de realizar o esquema temos que elaborar un resumo do texto; pero, ollo! Non vale con parafrasear o texto, senón que debemos realizar o resumo coas nosas propias palabras. Deste modo, darémonos conta se o texto foi comprendido ou non.

6.      Autocontrol

Despois de realizar os pasos anteriores, débense interiorizar os datos e ideas principais do tema. Este último paso non será complicado se fomos traballando os puntos anteriores con atención e concentración.

Ademais desta técnica hai que ter en conta a contorna onde estudamos; é dicir, se estudamos no escritorio debemos telo ben ordenado, sen ningún aspecto que nos poida distraer (televisión, mp3, videoxogos,…), en silencio, con boa iluminación e temperatura adecuada,…

Así mesmo, é recomendable planificar o noso tempo; non é adecuado permanecer toda a tarde diante dos libros, senón que é aconsellable que cada día se estude e así ter tempo libre. Tamén é preciso que, despois de cada hora de estudo, realicemos un descanso de 5-10 minutos.

Espero que esta técnica vos sirva de axuda para poder mellorar o voso estudo. 

Un saúdo!

María P. Sande