ERROS MÁIS FRECUENTES NA BUSCA DE EMPREGO

No momento actual de crise que estamos a pasar no noso país é recomendable que o proceso de busca de emprego sexa o máis efectivo posible; para isto, é importante intentar non cometer demasiados fallos. 

Para comezar a miña andaina por estes lares publicarei, de maneira xeral, os erros que cometemos con máis frencuencia cando estamos buscando traballo.

• Non ter un obxectivo profesional.

Antes de comezar co envío de curriculums vitae, debemos definir cal é o noso obxectivo a conseguir (que posto ou postos laborais desexamos desempeñar). Neste senso, aínda que consigamos un traballo que non se relacione coa nosa profesión, é aconsellable que non nos acomodemos e sigamos loitando para alcanzar a noso obxectivo profesional.

• Non planificar o proceso de busca de emprego.

É importante que coñezamos o quefacer da empresa e/ou entidade á que lle enviamos o noso curriculum vitae. Para isto, é aconsellable levar un rexistro das empresas ás que lle mandamos o noso currículo para que non nos pillen desprevidos e descoñezamos a súa labor cando se poñan en contacto con nós.

• Limitarse a buscar por Internet.

Hoxe en día a maioría das ofertas de emprego publícanse a través da Internet; pero non nos podemos esquecer que os métodos tradicionais aínda seguen activos e se é posible, é recomendable que, ademais de enviar o curriculum vitae pola internet, se entregue de maneira presencial para que noten o interese que temos en traballar nesa empresa.

Ademais, non nos podemos olvidar que é aconsellable e interesante ampliar a nosa rede de contactos profesionais, pois coñecendo a máis xente poida que nos decatemos de máis oportunidades de emprego.

• Descoidar a imaxe nas redes sociais.

Temos que ter coidado con todo tipo de materiais e comentarios que se publican nas actuais redes sociais; isto pode prexudicar a nosa imaxe profesional e influír nunha selección de persoal para un posto de traballo. Por isto, é aconsellable elixir e seleccionar as fotos que se colgan e se fan públicas, como os comentarios que se realizan pola internet. Con un só clic, os responsables de recursos humanos de calquera empresa ou entidade poden coñecer aspectos da nosa vida persoal que non nos favorezan. Isto non significa que teñamos que esquecernos das redes sociais, senón coidar o uso que facemos delas, xa que do mesmo xeito que nos poden prexudicar, tamén nos poden beneficiar, pois é unha forma demostrar os nosos intereses, contactar con entidades ou empresas, ampliar a nosa rede de contactos profesionais, ademais dunha posible vía para coñecer ofertas de emprego.

• Non coidar o curriculum vitae, a carta de presentación e a entrevista.

Todas e todos sabemos que a primeira impresión que ós/ás responsables da empresa lle chega de nós é a través do noso curriculum vitae e da carta de presentación. Neste senso, debemos ter o máximo coidado en non cometer erros cando realizamos e entregamos o curriculum vitae e a carta de presentación; segundo sexa a presentación destes documentos tamén vai ser a impresión que eles e/ou elas crearán de nós. Así mesmo, cando nos convocan para unha entrevista debemos coidar o noso aspecto físico (vestimenta, hixiene,...).

• Non coñecer os recursos existentes.

Estar desinformadas/os das axudas e bolsas que se publican poden ser perdas de oportunidade de emprego; é aconsellable estar pendente dos boletín oficiais da nosa comunidade e dos provinciais; algunhas veces convócanse axudas para as persoas que están en situación de desemprego. No Servizo Público de Emprego tamén nos informarán de servizos ou convocatorias das que poidamos beneficiarnos.

• Actitude negativa ante a busca de emprego.

Despois de pasar moitos procesos de selección de persoal é difícil que a actitude e a motivación non vaian decaendo, sendo un factor perigoso e influínte na busca de emprego. Non podemos desanimarnos se non nos chaman para ningunha entrevista ou se cando imos non resultamos seleccionados/as, senón que temos que analizar as causas e seguir adiante coa mesma motivación e actitude.

Temos que pensar que cada entrevista de traballo é unha experiencia máis e unha oportunidade de aprendizaxe; así mesmo, é recomendable que cando rematemos unha entrevista nos autoavaliemos e identifiquemos os fallos cometidos para poder ir mellorándoos para posteriores procesos.

• Buscar UN posto de traballo.

Aínda que consigamos un posto de traballo, é recomendable non descoidar o noso proceso de busca de emprego; os tempos foron cambiando e con el o mercado laboral e agora é moi complicado atopar un traballo para toda a vida. Non podemos ir cerrando portas unha vez que se atopa emprego, senón que, pola contra, débense ir abrindo máis por se nun futuro son necesarias.

En posteriores entradas, profundizaremos nalgúns dos aspectos enumerados nesta publicación.

Sen máis.....un saúdo! 

María P. Sande